وقالت عفاف شعيب في تصريحات خاصة لـ"لها"، إن كل ما قاله المخرج محمد سامي غير صحيح، وهناك شهود من الممثلين، بينهم الفنانون تامر حسني ومي عز الدين وأحمد زاهر ومادلين طبر... حيث كانوا موجودين وقت حدوث الواقعة ومن الممكن سؤالهم لمعرفة الحقيقة.
وأضافت عفاف شعيب: "كل دول عايشين اسألوهم، وهل كل دول كذابين؟ وبيقول لا ماروحتش المستشفى كذّاب، وفي كتير شهود منهم اللي عايشين ومنهم اللي توفوا... ليه محمد سامي مردّش من 2011 وقت الواقعة؟ هو ساكت ليه كل السنين اللي فاتت دي؟ كل شخص عارف أصله وتربيته كويس، والنشأة السليمة بتظهر على كل واحد".
وعن تصريحات محمد سامي بعدم ردّه عليها بخصوص تلك الحادثة احتراماً لسنّها، أوضحت عفاف شعيب: "وهو معندوش كلام يقوله وفاكر إني هسكت، وأنا كنت وقت الواقعة صغيرة ماردّش عليا ليه؟ لو عندي 100 سنة لازم يحترمني ويفرق أنا مين وهو مين وكلامه فاضي، واللي خارج من بيت أهله شبعان بيفضل محترم طول عمره، واللي بيخرج من بيت أهله جيعان، يخوّف وتتوقع منه أي شيء".
وكان المخرج محمد سامي قد تحدث عن خلافه مع الفنانة عفاف شعيب، قائلاً: "أنا بحترم بس سنّها، عفاف شعيب ست كبيرة، وهبقى رجل قليل الأدب لو تجاوزت معها". وأضاف: "قصة عفاف شعيب كلها كذب، وأنا بحترم سنّها لأنها ست كبيرة، وهي قالت كلام كتير كله كذب، القصة الحقيقية إننا مرة كنا بنصوّر مسلسل "آدم" ونفس الوقت بيتصور جنبنا مسلسل اسمه "دوران شبرا"، والأستاذة عفاف استأذنت قالتلي أخويا تعبان ومسافرة أعالجه، قلتلها تمام، وأنا بصوّر بالصدفة كلّمني صديق اسمه جوزيف قاللي تعال عدّي عليا أنا بصوّر مشهد لعفاف شعيب، وعرفت إنها في استوديو ورانا، وموضوع ضهرها ده محصلش".
