أعرب مطرب المهرجانات المعتزل علي قدورة عن استيائه من تعثر أوضاعه المادية خلال الفترة الحالية، مؤكدًا أنه لم يتخذ قرارًا نهائيًا بالعودة إلى تقديم أغاني المهرجانات، رغم مرور ثلاث سنوات على اعتزاله، مشيرًا إلى أنه يعيش حالة من الصراع الداخلي وعدم الاستقرار في اتخاذ القرار.
ونشر علي قدورة مقطع فيديو عبر حسابه الرسمي على موقع "فيسبوك"، تحدث خلاله عن المرحلة التي يمر بها، قائلًا: "أنا عارف إن فيه ناس كتير هتشوف الفيديو ده وهتتكلم وهتسأل، وبحكم إني شخص موجود على السوشيال ميديا مينفعش أكلم نفسي بس. لحد دلوقتي ماخدتش أي قرار، وربنا هو أعلم وأدرى باللي جوايا. أنا حاولت، ومحدش كلمني علشان أبطل، ولا كلمني علشان أرجع".
وأضاف: "أنا ماخدتش أي قرار خالص، وربنا يثبتني، لكن أنا في موضوع صعب جدًا. ومخدتش الظروف دي حجة، لأن خلال الثلاث سنين اللي فاتوا مريت بحاجات أصعب من كده، وبيتهيألي إن دي مش حجة. كمان مفتكرش إن حد وقف جنبي بعد ما بطلت، أو مد لي إيده، أو وفر لي شغل في شركته، أو حتى اقترح عليّ مشروع أشتغل فيه، محدش قال لي أي حاجة".
وتابع علي قدورة حديثه موضحًا أن كثيرين ما زالوا يعتقدون أنه يحتفظ بالأموال التي حققها من الغناء، وقال: "90% من الناس اللي بيشوفوني فاكرين إني لسه بصرف من فلوس المهرجانات، وعشان كده أغلب الرسائل اللي بتجيلي كلها طلبات مساعدات، والله ما حد محتاج مساعدة غيري. أنا مش بشتكي، لكن بحاول أوضح وجهة نظري. أنا لا عايز ولا هقبل حاجة من حد".
وأوضح أنه اتجه إلى إنشاء مشروع خاص بعد الاعتزال، مضيفًا: "أنا فتحت مشروعي واشتغلت كويس، وبعد كده الدنيا اتغيرت تمامًا، واتداينت، والأمور اتعقدت معايا، ولو الوضع استمر بالشكل ده هقفل المحل آخر السنة، ويمكن قبل كده".
واختتم علي قدورة رسالته مؤكدًا أنه يمر بصراع نفسي كبير، وقال: "محدش أدرى بعباده غير ربنا. أنا بكلم نفسي بصوتين، وجوايا اتنين بيتكلموا وبيحاربوا بعض، وأنا واقف بينهم ومش عارف أقول إيه. أنا حاولت وأنا في عز شهرتي، وفي الوقت اللي كنت فيه مسموع، ومكنتش مجبر على حاجة، لكن بجد تعبت واتداينت، وبقيت بتشاف بشكل وحش، لأننا بقينا في زمن المظاهر والفلوس. أنا مش طايق أسمع كلمة ولا نصيحة من حد، وأنا أقرب واحد لنفسي".
