تمشية الهناء
كتبه/ يعقوب محرز جار الله
محافظة إب - اليمن
الأكثر قراءة:
وصفة سحرية تجعل حياتك الزوجية في شهر عسل دائم
قامت بوضع الثوم على اللبن وكانت النتيجة مذهلة مفعول كالسحر خاصة للمتزوجين.. إليكم الطريقة
نبتة برية تقتل السرطان وتقضي نهائياً على الكوليسترول.. منتشرة في معظم المناطق- صورة
ضحك عليها الدنجوان وخطفت زوج أعز صديقاتها.. أسرار من حياة قطة السينما المصرية
أسهل طريقة لتحضير اللحوح البلدي وتجهيز الشفوت للمبتدئين
ما الذي يجب إضافته للشاي لتخفيف الصداع بسرعة؟
7 أنواع من المكسرات يجب عليك أكلها باستمرار .. و7 أنواع احذر لا تتناولها مهما كان هوسك بها! .. تعرف عليها
=====================================
85..................
امس الليل قررنا نعمل غدا ونولي حديقة السلام نتغدي ونفتهن حين الدنيا مش زحمة .. المهم صلينا جمعة والفرحة تغشانا من ابوابها السبعة واخذنا الغدا والفراشات واثنين مداكئ والضغاط والصحون ... وصلنا والدنيا زحمة رجال ونسوان الله وكيلكم ماحد بقدر يحط رجله وقد كل الأماكن محجوزة .. المهم داوسنا بهذه الحمولة كلها لوما حصلنا لنا بقعة سفري . احنا جلسنا مدينا الغدا وادي الله ثلاث نسوان معاهن خيمة سفري يشتين يركزينها جنبنا وجالسات يتضاربين هن والخيمة ماقدرين يصلحينها ... المهم احنا لنطابش على الغدا وواحدة منهن صيحت لي قالت اركز الخيمة حقهن ... وزوجتي قالت حرام ماتقوم . اجلس اتغده مش وقتهن ... المهم اخوكم اخذته الحمية العربية وقمت ابعسس بالخيمة وعيالي اتغدوا عليي بالعاني بتوجيهات عليا من امهم . .. طبعا انا طول عمري مقد ركزت خيمة بلاستيك ولا اعرف كيف اتعامل معاهن لكن مو نعمل للفضول ..
المهم قمت ابعسس بالخيمة اجرب هذا الوتد للبقعة هذه ومابسبرش وارجع اجربه للبقعة الثانية ومايسبرش. وصاحبة الخيمة تقول لي انتبه تكتسر كما غالية .. المهم كنت اشتعل وعين على الخيمة وعين على الغداء وعيالي قدهم ميتين من الضحك عليا . انا ضبحت من الخيمة وصيحت لابني عز الدين يجي يعاوني . المهم قام لعندي وهو يضحك وقلت له امسك القماش وانا ادخل الوتد .. هو مسك القماش . وانا جيت ادخل الوتد بفوة وهو اكتسر امانه لما تهرين اذاني .. وابني قرح من الضحكة .. وصاحبة الخيمة قالت موصوت ؟؟؟ امانه ياخبرة اننا اتمنيت انه صوت العمود الفقري حقي ولا الوتد حق الخيمة .. يالطييييف والإحراج .. معادريت ايش اقول لها فقلت لها هذه الخيمة خاربة الاوتاد حقها قاهن يابسات .. وعيالي الثواني قرحوا من الضحكة ... وانا مكاني ابعسس وانا مدعمم معاجزمت ارفع حتى راسي واصيح فوق عز الدين امسك يابن الكلب سوى ...
المهم جلست اعاصرها ساعة ونص لما استقامت وقلت مكانه اجر .... ورجعت اتغديت الحاصل .... وركزت المدكأ وبدأت اخزن وازدادوا الناس والعوائل ومعابش مسافة شبر .. المهم كان من ما خلف يزبط طرف طرف الخيمة لما يفئد اللي بداخلها وما اسمع الا الصوت من داخل الخيمة ( الله يلعنه وين جاء ركزها .. معاقدرش يحرفها قليل من الطريق ) وعيالي يضحكوا وانا ااااح ولا داخل ... وان بنتي الصغيرة قد جاءت تشتي تولي عند لعبة الحصان . فقلت لها الدنيا هناك زحمة ولازم تسيري مع مرافق بالطابور ومرافق فوق الحصان لجل ماتندربي . وهات يابكاء .. المهم وسير يايعقوب طوبر .. المهم زلجنا لعبة الحصان ومقد طعمت القات .. انا وصلت واكتشفت ان ابني عز الدين راح يجيب ماء ومقد رجعش .. ورحت البقالة ادوره وماهلاش وارجع اولي ادوره بين الأمة هذه كلها وماحصلته . . ياالله خارجنا .. وبالكااااااد حصلته قال انه خرج اشتري من خارج ومعارضي العسكري يدخله ..
المهم قلنا قد احنا نطعم القات وركزت المدكأ وان بنت جارتنا جاءت هي وبنتها وقالت اخلي بنتها عندنا لوما تسير المصلى تصلي ... فقلت تمام عادي .... مابش خمس دقائق إلا واحترف والجهال كلهم قد اتطايروا معابش جنبي الا بنت الجيران ( ياالله خارجنا ) فقلت في نفسي هيا هم بيلعبوا بالحديقة والدنيا امان الله انا اعمل عودي واقوم ادورهم .. اهم شي بنت الجيران جنبي .. المهم انا عملت عودي ومادريت الا وهم بيذيعوا اسمي بالمكرفون ( ابو عزالدين يعقوب محرز يتوجه الى الادارة ) امانه لما سقعين بطوني قلت ان عز الدين قد اندرب من فوق لعبة .. سرت اجري للادارة وحصلته هناك . وقالوا لي هذا ابنك ؟ فقلت ايوه . خير ؟؟ ايش حصل به ؟؟ فقالوا لاتخاف مابه شي مابلا ابنك ضرب جاهل وهذا ابوه يشتي يلقيك . المهم كانت المضرابة من سب الطابور حق اللعبة واعتذرت للأب وشليت ابني ووصلنا للبقعة وان بنت الجيران معاهلهاش
...
خليت ابني ببقعتي وسرت ادور بنت الجيران ووالله مالي علم ايش اسمها ولا ايش اسم ابوها وبالصدفة لقيت الجهال حقي ورجعتهم للبقعة حقي وقلت لهم ماحد يتحرك من مكانه لوما ارجع ... ورجعت ادور بنت الجيران .... لما حصلتها ورجعتها للبقعه .. وقالوا عيالي ان امها قدجاءت ورجعت سارت تدورها ( يالله خارجنا ..) ورجعت ادور امها .. وفجأه الدنيا وقعت هجوة .. والمطر حينزل .. فقمت اتصلت لابني الكبير صلاح قلت له يجيب الباص ويجي لنا ذلحين .. المهم ربع ساعة لوما حصلنا الأم قدهي سع المجنونة على بنتها ... والمطر هجش ... فقمنا اتلفلفنا وصيحت لابني عز الدين يعاوني فقالوا انه قد سار الحمام حق الحديقة ( لاحول ولاقوة الا بالله ) اين اسير ادوره ذلحين ... دخلت الحمامات وفي ثلاثة مليون آدمي بالصالة حق الحمام ... كم ادور وكم اخلي ؟؟؟؟
المهم خرجت وجلست بالساحة بين المطر لجل احصله .. وابني الكبير اتصل فال ماقدر يدخل بالباص الدنيا زحمة فقلت له انتظر عند المحطة واحنا نجي لاعندك ... المهم خليت العيال نبعوا لعند المحطة .. وانا جالس وسط المطرة ادور عز الدين .. والناس بيتجاروا السارح على الراجع .. واللي بيدور ابنه واللي يدور امه واللي تدور زوجها واللي تدور بنتها وهكذا.... . لو ما حصلت ابني ... وان صاحبة الخيمة جاءت تجري تتوسل افك لها الخيمة ... فقلت لابني يسبق لعند المحطة وانا الحق بعد شوية ...
المهم جلست افكفك الخيمة بين هذيك المطرة وعلفطتها علفطة ..
وابني وصل لهناك وطلع الباص وامه بتسأله وين ابوك ؟؟؟ قال لها ببفكفك الخيمة .. لوما خليها تولع سبعة الف درجة مئوية .. ونزلت من الباص تجري بين هذيك المطرة بكلها .. واتواجهنا باب الحديقة .. ( يعني بدل ماتدور عيالك جالس تفكفك الخيمة ؟؟) وهات يامصياحي طول الطريق ... والله يلعن ابوها تمشية . وسلامتكم هههههههه .
