ذلحين كيف يا أولياء الأمور
انتوا راضيين بهذا التعكيف وبهذا الجور الثقيل اللي مطير النوم من عيون الغالبية العظمى كلما فكروا بتكاليف رسوم تسجيل ابنائهم في المدارس هذا العام؟
خلونا نتضامن مع أنفسنا شوية في هذا الموضوع المقلق اللي كلنا بنعاني منه بصراحة.
وهو موضوع الساعة الآن، واحنا كأولياء أمور نعيش ظروفا صعبة يفترض نعمل أي احتجاج يوصل صوتنا للمعنيين بهذا الشأن العام.
هو موضوع يهم كل واحد فينا؛ ومش هو موضوع سياسي عشان ندعمم أو نخاف من نتائج تأويله من أي طرف كان.
واحنا أولياء الأمور عددنا مش قليل خالص.
و لو عملنا إضراب شامل في عموم الجمهورية عن تسجيل ابنائنا بالمدارس هذا العام ولو لمدة شهر واحد فقط؛
اقسم بالله أن كل المدارس اللي تتاجر بالعملية التعليمية بتراجع حسابها وبتخاف من الافلاس، وبتخضع لشروط أولياء الأمور، وبنخرج في النهاية اقلها بتسوية تقضي بتخفيظ نص الرسوم المفروضة علينا.
خلونا نجرب الإضراب لشهر واحد بس ما بنخسر شيء والله.
خلونا نعتبر الموضوع على أقل تقدير أن كورونا رجعت مثلا وان المدارس قفلت أبوابها لهذا السبب.
خلونا نجرب كيف ننتصر لأنفسنا في قضية عامة وتعالوا نعمل حاجه اسمها "رابطة أولياء الأمور المتضررين من رسوم تسجيل ابنائهم في المدارس لهذا العام".
واللي عنده اي افكار كويسه تدفع بهذا الاتجاه يشاركها في منشور
وقالوا العيار اللي مايصيبش يدوش.
خلونا ندوشهم على الأقل زيما ادوشونا وطيروا النوم من عيوننا.
من صفحة الكاتب على الفيسبوك
