قالت عبير صبري خلال حوارها مع هبة حيدري، في برنامج "منا وفينا"، إنها عاشت معاناة طويلة مع نوبات الهلع التي قادتها إلى أقسام الطوارئ في المستشفيات عدة مرات أسبوعيًا، قائلة: "جت لي نوبات هلع كتير، ولا زلت بعاني منها لغاية دلوقتي ولا زلت بتعالج، كنت ما بقدرش أقف وأبص في المراية.. لأني مش عارفة مين اللي في المراية دي.. مش عارفها وصعبانة عليَّ.. ماكنش عندي القدرة أطبطب على نفسي.. كنت بهرب من نفسي.. كنت مهزومة جدًا"، مؤكدة أنها استغرقت شهورًا طويلة حتى تمكنت من استعادة قدرتها على مواساة نفسها والدعم الذاتي.
وأكدت أن شقيقتها الإعلامية مروة صبري، وصديقة مقربة منها كانتا الملاذ الوحيد لمشاركة وجعها، لكن السند الأكبر والأهم كان التقرب إلى الله، متابعة: "ربنا كان جنبي أوي، وكنت بكلم ربنا وأقوله أنا لوحدي أنقذني.. ربنا أهم حاجة في حياتي.. هو السند.. كان بيطمني، وبدأت أحس إن فيه دعم من ربنا". وتابعت: "الفقد أيًّا كان شكل الفقد هو مؤلم، الفقد بالموت، الفقد بالانفصال.. ده من أصعب التجارب اللي بيمر بها البني آدم.. الفقد ده بيأذي".
وفي لفتة إنسانية مؤثرة، رفضت عبير رفضًا قاطعًا الخوض في تفاصيل خسارتها برحيل شقيقها الوحيد "أحمد"، الذي رحل بشكلٍ مفاجئ عام 2022، مطالبة بإغلاق الموضوع تمامًا وعدم التحدث فيه ولو للحظة واحدة، وعبّرت عن حالتها تجاه هذا الفقد بقولها: "الموضوع ده إنكار، يعني أنا بعامل الموضوع ده بالإنكار ما أقدرش أتكلم عنه خالص الموضوع ده ما حصلش.. ما حصلش".
وعن احتمالية دخولها في قصة حب جديدة بعد أزمة انفصالها، نفت عبير فكرة "اعتزال الغرام" على خطى الفنانة ماجدة الرومي، معتبرة أن الأمر كله مسألة قدرية، قائلة: "اللي ربنا كاتبه لي، يعني لو ربنا كاتب لي حاجة تفرحني أنا هستقبلها بسعادة لأنها نعمة ربنا.. يعني أنا ما بفتش على الحب خالص ولا عن راجل يدخل حياتي".
وعن مدى تعافيها من أزمة الطلاق، أكدت أنها قطعت نسبة قوية في رحلة الشفاء النفسي لكنها ما زالت في طريقها لاستكمال هذا التعافي تمامًا.
وعن مواصفات شريك حياتها في المستقبل، قالت: "شخص صادق.. شخص يعرف يحبني.. يقدر يعبر عن مشاعره.. يقدر يكون يقف جنبي.. يسندني.. أحس بأمان.. ما أحسش إني لوحدي وأنا معاه"، معتبرة أن شعور الوحدة في وجود شريك هو أصعب ما يمكن مواجهته.
وحول الارتباط برجل يمتلك قلبًا بلا مال، أو رجل بمال بلا قلب، حسمت عبير صبري موقفها برفض الارتباط بأي شخص لا تكنّ له مشاعر الحب، مؤكدة أن تفاصيل الحياة اليومية تصبح مستحيلة دون عاطفة، متابعة: "دلوقتي صعوبات الحياة وضغوط الحياة والحياة الصعبة اللي كل الناس عايشينها في كل مكان.. أكيد أنا هتمنى إنه يكون راجل يقدر يعيشني بطريقة مرتاحة وبرضه يكون بيحبني وبحبه.. بس طبعًا برضه يكون عنده فلوس هو يمنع؟ بالعكس عايزين برضه يبقى في فلوس أكيد".
وأبدت مخاوفها تجاه المستقبل، واصفة نفسها بأنها شخصية تخاف بطبعها مما يحمله الغد، كاشفة عن مناجاتها اليومية قبل النوم، قائلة: "أنا بنام بالليل قبل ما بحط راسي على المخدة بقول له يا رب أنا هنام النهارده إن شاء الله كويسة وهصحى بكرة كويسة، وإذا ماما وإخواتي كويسين.. بقعد أطلب منه كدة طلبات زي الأطفال كدة وأنا لسه مغمضة عيني".
