وكتبت منة عدلي القيعي عبر حسابها الشخصي في "فيسبوك": "عايزة أقول حاجة لكل الشخصيات العامة اللي في الدنيا، الناس مش مهتمة... مش مهتمة تشوفك كويس، ولا مهتمة تشوفك وحش... ماتحزقش أوي وإنت بتدافع عن موقفك، ولا تخسر نفسك وإنت بتخرج كواليس بيتك بس عشان تقول أنا مش غلطان ولا أنا حلو".
وأوضحت القيعي أن اهتمام الجمهور بالشخصيات العامة غالباً ما يكون مرتبطاً بالمحتوى المتداوَل عنهم، وليس بتفاصيل حياتهم الشخصية أو الصورة التي يحاولون تقديمها عن أنفسهم.
وأضافت: "الناس مش مهتمة... إنت بالنسبة لهم سكرول في صفحة ماليانة أخبار وفضايح وإشاعات وتصريحات وخناقات. الناس مش مهتمة إنت رقم واحد ولا 100، الناس مش مهتمة إنت أعلى ولا أدنى أجر، الناس مش مهتمة بجرحك اللي بتتوسل ليهم يراعوه، ولا قصة كفاحك اللي إنت بتحكيها ومستنّيهم يسقّفوا".
وتابعت: "دي حاجات ليك أنت، أنت وأهلك وحبايبك... دول مهم يشوفوا حقيقتك. أما اللي ورا الشاشة... أنت بالنسبالهم محتوى... زرار هاها ولايك ولاف وغاضب".
وتطرقت منة القيعي الى تأثير التعليقات والانتقادات المتداولة عبر مواقع التواصل الاجتماعي في الشخصيات العامة، مشيرةً الى أن ردود الفعل عليها قد تستنزف وقتاً وطاقة أكبر بكثير من حجم اهتمام صاحب التعليق نفسه. إذ قالت: "الكلمة اللي بتتكتب فيك وتصحّيك بالليل وتفكّر هترد عليها إزاي دي، خدت منك أيام، وهزة نفس ودفاع مستميت وحزقة... وخدت منه دوسة على زرار، وياريته مهتم".
ووجّهت القيعي نصيحتها الى الشخصيات العامة قائلةً: "خلّيك في شغلك. خلص، مبروك صفحة واقلب... وإما تعوز ترد لجماهيرك العريقة... عد لعشرة... يمكن تروح لوحدها".وأكدت منة عدلي القيعي أن تقييم الجمهور للعمل الذي يقدّمه الشخص العام يظل أكثر أهميةً من الانشغال المستمر بآراء الناس في حياته الشخصية، مع استثناء القضايا المرتبطة بالمبادئ الإنسانية والعدل والظلم، حيث قالت: "رأي الناس في شغلك هو الحاجة الوحيدة اللي ليها قيمة، دا طبعاً بعد آرائنا كلنا في القضايا الإنسانية والعدل والظلم وكلمة الحق... يمكن يوم تفرق في حاجة".
واختتمت رسالتها قائلةً: "فيما عدا ذلك... أعتقد إن آراءنا في بعض مش مهمة بالتساوي... إحنا في حياة بعض رزايز... فا بالراحة على نفسك... عشان والله مش مهم".
